តូក្យូ៖ ក្រសួងការពារជាតិជប៉ុន បាននិយាយថា កូរ៉េខាងជើង នៅថ្ងៃនេះ បានបាញ់មីស៊ីលមួយគ្រាប់ទៀត ចេញពីឆ្នេរសមុទ្រភាគខាងលិចនៃប្រទេសកូរ៉េខាងជើង ហើយត្រូវបានគេរំពឹងថា នឹងបាញ់ចូលទៅក្នុងសមុទ្រប្រហែលចម្ងាយ៥៥០គីឡូម៉ែត្រពីឆ្នេរសមុទ្រភាគខាងកើត នៅខាងក្រៅតំបន់សេដ្ឋកិច្ចផ្តាច់មុខរបស់ជប៉ុន។
មន្ត្រីយោធាកូរ៉េខាងត្បូង មិនបានផ្តល់ព័ត៌មានលម្អិតណាមួយអំពីការបាញ់បង្ហោះនោះទេ ចំណែករដ្ឋភិបាលក្រុងព្យុងយ៉ាង ក៏មិនទាន់ចេញការអធិប្បាយជាផ្លូវការនៅឡើយដែរ។
ទីភ្នាក់ងារសារព័ត៌មានរដ្ឋកូរ៉េខាងជើង បាននិផ្សាយថា ការបាញ់បង្ហោះកាលពីថ្ងៃអង្គារ គឺជាមីស៊ីលផ្លោងយុទ្ធសាស្ត្រចំនួនពីរគ្រាប់ ដែលត្រូវបានបាញ់ចេញពីតំបន់ខាងត្បូង ហើយបានធ្លាក់ចំលើគោលដៅនៅលើកោះមួយ មានចម្ងាយ៦១១.៤គីឡូម៉ែត្រ ពីទីក្រុងព្យុងយ៉ាង។
ចំណែកការបាញ់សាកល្បង កាលពីថ្ងៃអាទិត្យ ពាក់ព័ន្ធនឹងការបាញ់មីស៊ីលគ្រុស ចំនួនពីរលើកចេញពីនាវាមុជទឹក នៅឈូងសមុទ្រ បានធ្លាក់ចំគោលដៅនៅសមុទ្រខាងកើត ដែលត្រូវបានគេស្គាល់ថា ជាសមុទ្រជប៉ុន ដែលមានចម្ងាយ១ ៥០០គីឡូម៉ែត្រ ពីទីក្រុងតូក្យូ។
រដ្ឋាភិបាលក្រុងព្យុងយ៉ាង បាននិយាយថា ការបាញ់មីស៊ីលចេញពីនាវាមុជទឹកលើកនេះ ក្នុងគោលបំណងជាពិសេស ដើម្បីជាការបង្ហាញពីការប្រឆាំងនឹងល្បែងសង្គ្រាមរវាងអាមេរិក និងកូរ៉េខាងត្បូង ដែលបានចាប់ផ្តើមធ្វើសមយុទ្ធរួមគ្នា កាលពីថ្ងៃចន្ទ។
ទន្ទឹមនឹងនេះដែរ ប្រធានាធិបតីកូរ៉េខាងត្បូង លោក យូប ស៊ុកយើល (Yoon Suk Yeol) បានរៀបចំធ្វើដំណើរទៅកាន់ប្រទេសជប៉ុន ដើម្បីជួបពិភាក្សាជាមួយនាយករដ្ឋមន្ត្រីជប៉ុន លោក ហ្វូមីអូ គីស៊ីដា (Fumio Kishida) ដែលគេរំពឹងថានឹងពិភាក្សាអំពីភាពជាដៃគូផ្នែកសន្តិសុខជាមួយរដ្ឋាភិបាលទីក្រុងវ៉ាស៊ីនតោន ក្នុងគោលបំណងរួមគ្នាប្រឆាំងចំពោះការគំរាមកំហែងពីកូរ៉េខាងជើង និងពីមហាយក្សចិន។
ទោះយ៉ាងណាក៏ដោយ សម្ព័ន្ធភាពនឹងត្រូវតែជម្នះនូវរបួសប្រវត្តិសាស្ត្រមួយចំនួន ព្រោះថា កូរ៉េទាំងពីរមិនបានទទួលការលើកលែងទោស ឬបំភ្លេចចោលនូវការគ្រប់គ្រងរបស់ជប៉ុនជាច្រើនទសវត្សរ៍កន្លងមកហើយ នៅពេលជប៉ុនបានកាន់កាប់ឧបទ្វីបនេះ នៅឆ្នាំ១៩០៥ ហើយបានបញ្ចូលកូរ៉េទាំងពីរជាប្រទេសតែមួយ ក្នុងឆ្នាំ១៩១០ ប៉ុន្តែបានបែកបាក់គ្នាទៅវិញ ក្រោយជប៉ុនចុះចាញ់សង្គ្រាមលោកលើកទី២ នៅឆ្នាំ១៩៤៥។
រដ្ឋាភិបាលជប៉ុន ដែលកើតចេញពីការកាន់កាប់របស់សហរដ្ឋអាមេរិក ក៏បានអនុម័តគោលនយោបាយរក្សាត្រឹមតែកម្រិតកងកម្លាំងស្វ័យការពារសម្រាប់ជប៉ុន ដែលទីក្រុងតូក្យូ បានលុបចោលកិច្ចព្រមព្រៀងនេញ កាលពីខែធ្នូ ឆ្នាំ២០២២ តាមការជំរុញរបស់រដ្ឋាភិបាលទីក្រុងវ៉ាស៊ីនតោន ក្នុងគោលបំណងកសាងកម្លាំងទ័ពសម្រាប់ទប់ទល់ឥទ្ធិពលរបស់ចិន។
ប៉ុន្មានថ្ងៃកន្លងថ្មីៗនេះ រដ្ឋាភិបាលទីក្រុងព្យុងយ៉ាង បានសាកល្បងអាវុធមីស៊ីល រួមទាំងអាវុធបាញ់ចេញពីនាវាមុជទឹក និងមីស៊ីលផ្លោងរយៈចម្ងាយខ្លី។
កូរ៉េខាងជើងបានបាញ់មីស៊ីលច្រើនជាងកាលពីឆ្នាំ២០២២ ក្នុងប្រឹងធ្វើទំនើបកម្មផ្នែកសព្វាវុធរបស់ខ្លួន ដោយបង្កើនការព្រួយបារម្ភកាន់តែខ្លាំងអំពីសន្តិសុខក្នុងតំបន់។
មន្ត្រីយោធាកូរ៉េខាងត្បូង បានចេញសេចក្តីថ្លែងការណ៍ថ្កោលទោសយ៉ាងខ្លាំងដល់ប្រទេសកូរ៉េខាងជើង ដោយហៅការបាញ់មីស៊ីលម្តងហើយម្តងទៀតថា ជាការញុះញង់យ៉ាងច្បាស់ក្រឡែត ដែលគំរាមកំហែងដល់សន្តិភាព និងសន្តិសុខក្នុងតំបន់ ហើយអ្នកនាំពាក្យក្រសួងការបរទេសសហរដ្ឋអាមេរិក បានរិះគន់ការបាញ់បង្ហោះនេះថា ជាការរំលោភលើដំណោះស្រាយក្រុមប្រឹក្សាសន្តិសុខអង្គការសហប្រជាជាតិជាច្រើន៕
