ប៉េកាំង៖ រដ្ឋមន្ត្រីការបរទេសចិន លោក ឈីន ហ្គង់ (Qin Gang) បាននិយាយថា វិបត្តិអ៊ុយក្រែន ហាក់ដូចជាបង្កឡើងដោយបាតដៃអត់ស្រមោល ដែលរុញច្រានសង្គ្រាមឲ្យអូសបន្លាយ និងបង្កជាជម្លោះភូមិសាស្ត្រនយោបាយកាន់តែស្មុគស្មាញ។
លោក ឈីន ហ្គង់ ដែលឡើងកាន់តំណែងបន្តពីលោក វ៉ាង យី (Wang Yi) បាននិយាយនៅក្នុងសន្និសីទសារព័ត៌មាននៅខាងក្រៅកិច្ចប្រជុំសភាប្រចាំឆ្នាំរបស់ប្រទេសចិន ក្នុងទីក្រុងប៉េកាំង ដោយមិនបានបញ្ជាក់ថា «បាតដៃបាត់អត់ស្រមោល គឺជាអ្នកប្រើប្រាស់វិបត្តិអ៊ុយក្រែន ដើម្បីបម្រើផលប្រយោជន៍ភូមិសាស្ត្រនយោបាយមួយ»។
លោកបានអំពាវនាវឲ្យមានការជជែកពិភាក្សាគ្នាឲ្យឆាប់បំផុត ដើម្បីស្វែងរកដំណោះស្រាយ។
លោកបានមានប្រសាសន៍ទៀតថា «ជម្លោះ ការដាក់ទណ្ឌកម្ម និងដាក់សម្ពាធ នឹងមិនអាចដោះស្រាយបញ្ហាបានទេ»។
ជំហររបស់ចិនចំពោះសង្គ្រាមអ៊ុយក្រែន ក្នុងប៉ុន្មានសប្តាហ៍ថ្មីៗនេះ ត្រូវបណ្តាប្រទេសផ្សេងៗទៀតតាមដានមើល ចំពេលទំនាក់ទំនងកាន់តែស៊ីជម្រៅរវាងរដ្ឋាភិបាលទីក្រុងប៉េកាំង និងរដ្ឋាភិបាលទីក្រុងមូស្គូ ចំណែកមេដឹកនាំបណ្តាមេដឹកនាំប្រទេសលោកខាងលិច បានប្រកែកថា ខ្លួនមិនអាចបណ្តោយខ្លួនឲ្យក្លាយជាឈ្មួញកណ្តាល នៅក្នុងកិច្ចចរចាសន្តិភាពឡើយ។
រុស្ស៊ីបានបញ្ជូនទ័ពចូលឈ្លានពានប្រទេសអ៊ុយក្រែន កាលពីថ្ងៃទី២៤ ខែកុម្ភៈ ឆ្នាំ២០២២ ដោយហៅថាជា ប្រតិបត្តិការយោធាពិសេស។
ជម្លោះនេះបានធ្ធ្វើឲ្យទីក្រុងនានារបស់អ៊ុយក្រែន កក្លាយជាផេះផង់ និងបណ្តេញមនុស្សរាប់លាននាក់ឲ្យរត់ភៀសខ្លួនទៅក្រៅប្រទេស និងធ្វើឲ្យសេដ្ឋកិច្ចពិភពលោកជួបវិបត្តិកាន់តែធ្ងន់ធ្ងរ។
លោក ឈីន ហ្គង់ បានសង្កត់ធ្ងន់ថា រដ្ឋាភិបាលទីក្រុងប៉េកាំង មិនដែលបានផ្តល់អាវុធដល់ភាគីណាមួយនៃជម្លោះអ៊ុយក្រែនឡើយ រីឯមន្ត្រីសហរដ្ឋអាមេរិកព្រមានអំពីផលវិបាកធ្ងន់ធ្ងរ ប្រសិនបើចិនបញ្ជូនជំនួយផ្នែកសម្ភារៈសឹកដល់រុស្ស៊ី។
លោករដ្ឋមន្ត្រីការបរទេសរូបនេះ បានបញ្ជាក់យ៉ាងម៉ឺងម៉ាត់ថា «ចិនមិនមែនជាភាគីនៃវិបត្តិនេះទេ ហើយក៏មិនបានផ្តល់អាវុធដល់ភាគីណាមួយនៃជម្លោះនោះដែរ។ ដូច្នេះ តើការនិយាយស្តីបន្ទោស ដាក់ទណ្ឌកម្ម និងការគំរាមកំហែងលើប្រទេសចិនមានមូលដ្ឋានអ្វី? នេះជាការមិនអាចទទួលយកបានជាដាច់ខាត»។
នៅក្នុងជំនួបជាមួយអ្នកសារព័ត៌មាន លោក ឈីន ហ្គង់ ក៏បាននិយាយអំពីទំនាក់ទំនងរវាងសហរដ្ឋអាមេរិក និងចិនផងដែរ ដោលោកសង្ឃឹម ថា ប្រទេសទាំងពីរអាចស្វែងរកវិធីត្រឹមត្រូវដើម្បីចុះសម្រុងនឹងគ្នាឡើងវិញ។
លោកបានសង្កត់ធ្ងន់ថា បញ្ហាកោះតៃវ៉ាន់ គឺជាចំណុចសំខាន់នៃទំនាក់ទំនងរវាងរដ្ឋាភិបាលទីក្រុងប៉េកាំង និងរដ្ឋាភិបាលទីក្រុងវ៉ាស៊ីនតោន ដោយលោកពណ៌នាថា វាជាចំណុចស្នូលនៃបញ្ហាស្នូល និងជាខ្សែបន្ទាត់ក្រហមទីមួយ ដែលមិនត្រូវឆ្លងកាត់ ក្នុងគោលការណ៍ទំនាក់ទំនងអាមេរិក-ចិន។
រដ្ឋាភិបាលប៉េកាំង បានអះអាងថា តៃវ៉ាន់ជាកមកម្មសិទ្ធិរបស់ខ្លួន ហើយមិនបានច្រានចោលការប្រើប្រាស់កម្លាំងយោធា ដើម្បីចូលគ្រប់គ្រងកោះតៃវ៉ាន់ នោះដែរ។
ការបង្កើនសម្ពាធផ្នែកយោធារបស់ និងផ្នែកការទូតលើកោះតៃវ៉ាន់ បណកើតឡើង ចាប់តាំងពីលោកស្រី សៃ អីងវិន (Tsai Ing-wen) អះអាងថា កោះតៃវ៉ាន់កំពុងស្វែងរកឯករាជភាព រីឯអនាគតរបស់កោះតៃវ៉ាន់ គឺអាស្រ័យលើប្រជាជនតៃវ៉ាន់៕
