បន្ទាយមានជ័យ៖ ម្ចាស់ដីនៅក្នុងខេត្តបន្ទាយមានជ័យម្នាក់ នាពេលថ្មីៗនេះ បានដាក់សំណើរជូនថ្នាក់ដឹកនាំជាន់ខ្ពស់នៃរាជរដ្ឋាភិបាលកម្ពុជា ដើម្បីអន្តរាគមន៍មករដ្ឋបាលខេត្តបន្ទាយមានជ័យ ធ្វើសកម្មភាពទប់ស្កាត់សកម្មភាពអនាធិបតេយ្យ និងការធ្វើបាតុកម្មខុសច្បាប់លើដីកម្មសិទ្ធិផ្ទាល់ខ្លួនរបស់លោក ដែលត្រូវគេបំពានចូលកាន់កាប់ដោយខុសច្បាប់។
ក្នុងលិខិតចុះថ្ងៃទី០១ ខែកុម្ភៈ ឆ្នាំ២០២៣ របស់លោក យឹម សំណាង បានផ្ញើជូន ក្រសួងមហាផ្ទៃ ក្រុមប្រឹក្សាស្ដាអភិវឌ្ឍវិស័យកសិកម្ម និងជនបទ រដ្ឋបាលខេត្តបន្ទាយមានជ័យ សុំធ្វើអន្តរាគមន៍ដើម្បីទប់ស្កាត់សកម្មភាពអនាធិបតេយ្យ និងការធ្វើបាតុកម្មខុសច្បាប់លើដីកម្មសិទ្ធិរបស់ខ្លួន ស្ថិតក្នុងភូមិសាមគ្គីមានជ័យ សង្កាត់ប៉ោយប៉ែត (បច្ចុប្បន្នសង្កាត់អូរជ្រៅ) ក្រុងប៉ោយប៉ែត ខេត្តបន្ទាយមានជ័យ។
លោកបានជម្រាបជូនក្រសួងមហាផ្ទៃ «ខ្ញុំបាទសូមគោរពអនុញ្ញាតជម្រាបជូន សម្តេចក្រឡាហោម មេត្តាជ្រាបដ៏ខ្ពង់ខ្ពស់ថា៖ ក្រសួងមហាផ្ទៃបានចេញលិខិតលេខ០៧៩ ស.ជ.ណ ចុះថ្ងៃទី៩ ខែមករា ឆ្នាំ២០២៣ ពាក់ព័ន្ធសំណើសុំរបស់ប្រជាពលរដ្ឋចំនួន៤០នាក់អន្តរាគមន៍ពន្លឿនការចេញវិញ្ញាបនបត្រសម្គាល់ម្ចាស់អចលនវត្ថុលើដីទំហំ១០៣ហិចតា ស្ថិតក្នុងភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។ ក្រោយពីបានទទួលលិខិតរបស់ក្រសួងមហាផ្ទៃលេខ០៧៩ ស.ជ.ណ ចុះថ្ងៃទី៩ ខែមករា ឆ្នាំ២០២៣ ឈ្មោះ ឈរ ស៊ុនលី បានដឹកនាំប្រជាពលរដ្ឋធ្វើបាតុកម្មខុសច្បាប់នៅលើដីរបស់ខ្ញុំបាទ និងនៅសាលាសង្កាត់អូរជ្រៅ ដើម្បីដាក់សម្ពាធដណ្តើមកាន់កាប់ដីខ្ញុំបាទ។
ជាងនេះទៅទៀត ឈ្មោះ ឈរ ស៊ុនលី និងបក្ខពួកបានយកបដារដែលមានខ្លឹមសារអយុត្តិធម៌ណាស់! អាជ្ញាធរត្រូវចេញប្លង់រឹងឲ្យយើងខ្ញុំ ព្រោះ យឹម សំណាង និង តាន់ អ៊ុក ប្តឹងយកដីយើងខ្ញុំ ដោយខុសច្បាប់ជាង៤៥គ្រួសារ ទៅគងនៅលើដីរបស់យើងខ្ញុំ» ។
លោកបានជម្រាបបន្តទៀតថា កាលពីឆ្នាំ១៩៩៨ ខ្ញុំបាទបានគ្រប់គ្រង កាន់កាប់ដីទំហំ៤៤.៦២៩ (បួនម៉ឺនបួនពាន់ប្រាំមួយរយម្ភៃប្រាំបួន) ម៉ែត្រក្រឡា ដែលមានបណ្ណសម្គាល់សិទ្ធិកាន់កាប់អចលនវត្ថុលេខ ប.ជ. ០០១៨២០ (CVIII ០៤៧១) ចុះថ្ងៃទី១៧ ខែកក្កដា ឆ្នាំ១៩៩៨ ចេញដោយនាយកដ្ឋានសុរិយោដី។ ក្នុងឆ្នាំ២០០៤ ត្រូវបានជនខិលខូចមានឈ្មោះ ឈរ ស៊ុនលី ចូលមកដណ្តើមកាន់កាប់ដោយខុសច្បាប់។ លុះនៅក្នុងឆ្នាំ២០១៨ ក្រុមគ្រួសារឈ្មោះ ឈរ ស៊ុនលី និងប្រជាពលរដ្ឋដទៃទៀត បានបំភាន់មន្រ្តីសាធារណៈ ដើម្បីធ្វើបណ្ណកម្មសិទ្ធិជាន់លើដីរបស់លោក។
លោក យឹម សំណាង បានអះអាងថា «ខ្ញុំបាទបានដាក់ពាក្យបណ្តឹងទៅតាមនីតិវិធីច្បាប់ និងបណ្តឹងរក្សាការពារដូចមានក្នុងដីកាសម្រេចរក្សាការពារលេខ២២៤ រកព/ឃ ចុះថ្ងៃទី២៥ ខែធ្នូ ឆ្នាំ២០១៨ របស់សាលាដំបូងខេត្តបន្ទាយមានជ័យ ទើបធ្វើឱ្យទីតាំងដីទំនាស់ខាងលើមិនទាន់អាចចេញប័ណ្ណកម្មសិទ្ធិបានឡើយ។ បច្ចុប្បន្ន បញ្ហាជម្លោះនេះកំពុងស្ថិតក្នុងដែនសមត្ថកិច្ចរបស់តុលាការ ដើម្បីចំណាត់ការទៅតាមផ្លូវច្បាប់ ទាំងសំណុំរឿងរដ្ឋ ប្បវេណី និងសំណុំរឿងព្រហ្មទណ្ឌចំនួនពីរ ដែលតុលាការខេត្តបន្ទាយមានជ័យកំពុងបន្តចាត់ការតាមនីតិវិធីច្បាប់»។
ដើម្បីដោះស្រាយវិវាទដីធ្លីដ៏រ៉ាំរ៉ៃនេះ លោកសុខចិត្តបរិចាគការខាតបង់ដីធ្លី និងអត្ថប្រយោជន៍ផ្សេងៗទៀត ក្នុងគោលបំណងបង្កើតភាពសុខដុមរម្យនា និងបង្កើនសាមគ្គីភាពនៅក្នុងមូលដ្ឋាន ក៏ដូចជាចូលរួមចំណែកដ៏ស្រាយវិវាទដីធ្លីឲ្យស្របតាមគោលនយោបាយដឹកនាំរបស់សម្ដេចអគ្គមហាសេនាបត្តីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលចង់ឲ្យប្រជាពលរដ្ឋគ្រប់រូបចេះចែករំលែក និងអាណិតអាសូរគ្នាទៅវិញទៅមក ក្នុងនាមជាជនជាតិខ្មែរ ពូជសាសន៍ថ្លៃថ្នូរតែមួយ។
លោក យឹម សំណាង បានបញ្ជាក់ជូនថ្នាក់ដឹកនាំជាន់ខ្ពស់ថា «ខ្ញុំបាទបានព្យាយាមធ្វើការជួបដោះស្រាយតាមយុទ្ធសាស្រ្តឈ្នះឈ្នះជាមួយបងប្អូនប្រជាពលរដ្ឋ ដែលរស់នៅ និងកាន់កាប់លើទីតាំងដីរបស់ខ្ញុំបាទ ហើយក៏មានប្រជាពលរដ្ឋជាច្រើនគ្រួសារបានសះជា និងដោះស្រាយបញ្ចប់ជាមួយខ្ញុំបាទក្រោមយុទ្ធសាស្រ្តឈ្នះឈ្នះ លើក លែងតែឈ្មោះ ឈរ ស៊ុនលី និងបក្ខពួក បានដឹកនាំប្រជាពលរដ្ឋធ្វើបាតុកម្ម ឬបង្កជាបាតុភាពអនាធិបតេយ្យផ្សេងៗ ដើម្បីដាក់សម្ពោធមកលើអាជ្ញាធរមូលដ្ឋាន ដើម្បីឱ្យចេញប័ណ្ណកម្មសិទ្ធិឱ្យពួកគេ។ ម្យ៉ាងទៀត លោក ឈរ ស៊ុនលី និងប្រពន្ធ តែងអូសទាញប្រជាពលរដ្ឋដែលមានបំណងចង់សះជានឹងខ្ញុំបាទមិនឱ្យធ្វើការដោះស្រាយ ឬសះជានឹងខ្ញុំបាទឡើយ ដោយគាត់អះអាងប្រាប់ពួកគេថានឹងយកដីស្របច្បាប់របស់ខ្ញុំបាទឱ្យបក្ខពួករបស់ខ្លួន ដោយ បំផ្លើស និងយកលេសថា លិខិតលេខ៦២សជណ.ឧស ចុះថ្ងៃទី១៩ ខែមករា ឆ្នាំ២០០៤ ចេញដោយទីស្តីការគណរដ្ឋមន្រ្តីបាន លុបចោលប័ណ្ណកម្មសិទ្ធិរបស់ខ្ញុំបាទ»។
ក្នុងលិខិតរបស់លោកបានបញ្ជាក់យ៉ាងច្បាស់ថា ចំពោះលិខិតលេខ ៦២ សជណ.ឧស នេះមានខ្លឹមសារផ្តល់សិទ្ធិកាន់កាប់ គ្របគ្រង់ធ្វើកម្មសិទ្ធិលើដីលំនៅដ្ឋានជូនប្រជាពលរដ្ឋពីក្បាលដីលោក ថាច់ ថៃ (ថាច់ អៃ) ដល់ត្រឹមក្បាលដីលោក ម៉ាន់ ណូរី (ម៉ាត់ ណូរី) តែប៉ុណ្ណោះ ឬអាចនិយាយបានថាមោឃភាពប័ណ្ណកម្មសិទ្ធិពីដីលោក ថាច់ ថៃ (ថាច់ អៃ) ដល់ត្រឹមក្បាលដីលោក ម៉ាន់ ណូរី (ម៉ាត់ ណូរី) តែប៉ុណ្ណោះ។ ចំណែកទីតាំងក្បាលដីចំនួន ៣ ក្បាលដី រួមមានទីតាំងដីរបស់ខ្ញុំបាទ យឹម សំណាង លេខ ប.ជ. ០០១៨២០ (CVIII ០៤៧១) ទីតាំងដីលេខ ប.ជ. ០០១៨០២ (CVIII ០៤៥៣) និងទីតាំងដីលេខ CVIII ០៤៦៦ មិនត្រូវបានលុបចោលនោះទេ។ ម្យ៉ាងទៀត ផ្អែកតាមខ្លឹមសារលិខិតលេខ ១០២៦ ដនស/អសដក ចុះថ្ងៃទី៨ ខែមិថុនា ឆ្នាំ២០២១ ចេញដោយក្រសួងរៀបចំដែនដី នគរូបនីយកម្ម និងសំណង់ បានអនុញ្ញាតឱ្យខ្ញុំបាទ និងលោកស្រី តាន់ អ៊ុក ( ភរិយាសពលោក ឈឹម ជួន) ធ្វើការចុះបញ្ជីបំពេញបន្ថែម បោះបង្គោលព្រំលើដីរបស់យើងខ្ញុំរៀងៗខ្លួន ដើម្បីក្លាយជាកម្មសិទ្ធិករពេញលេញ។
ក្នុងលិខិតដដែលបានបន្ថែមថា ឈ្មោះ ឈរ ស៊ុនលី បានបកស្រាយបំផ្លើសខ្លឹមសារនៃលិខិតលេខ ៦២ សជណ.ឧស និងប្រើគ្រប់មធ្យោយបាយទុច្ចរិត ដើម្បីយកដីរបស់ខ្ញុំបាទ និងលោក ឈឹម ជួន ដែលមានប័ណ្ណកម្មសិទ្ធិស្របច្បាប់ តែប៉ុណ្ណោះ។ លើសពីនេះ លោក ឈរ ស៊ុនលី បានបំផុស កៀងគរ និងប្រមូលប្រជាពលរដ្ឋ ដើម្បីប្រយោជន៍ផ្ទាល់ខ្លួន ដើម្បីធ្វើលិខិតទៅអាជ្ញាធរថ្នាក់ជាតិ ដូចមានក្នុងលិខិតអន្តរាគមន៍ ចុះថ្ងៃទី១៣ ខែកក្កដា ឆ្នាំ២០២២ ដាក់ជូនក្រសួងមហាផ្ទៃ។ ខ្លឹមសារនៃលិខិតអន្តរាគមន៍នេះ លោក ឈរ ស៊ុនលី បានបំភ្លៃព័ត៌មាន និងការភូតភរកុហកថ្នាក់ដឹកនាំខុសពីការពិត និងបកស្រាយខុសពីខ្លឹមសារដើមនៃលិខិតលេខ ៦២ សជណ.ឧស។ ការបំផុស ការកៀងគរប្រជាពលរដ្ឋធ្វើលិខិតអន្តរាគមន៍មកក្រសួងមហាផ្ទៃ គឺឈ្មោះ ឈរ ស៊ុនលី ធ្វើឡើងមិនមែនគ្រាន់តែបំពានលើកម្មសិទ្ធិរបស់យើងខ្ញុំ តែប្រឆាំងនឹងប្រយោជន៍សាធារណៈទៀត ព្រោះដើម្បីបម្រើផលប្រយោជន៍ សាធារណៈ និងជូនគណបក្សប្រជាជនកម្ពុជា អាជ្ញាធរថ្នាក់ក្រុងប៉ោយប៉ែត ក៏ដូចជាអាជ្ញាធរខេត្តបន្ទាយមានជ័យ បានសម្របសម្រួលជាមួយខ្ញុំបាទ ដើម្បីបើកផ្លូវមួយខ្សែមានប្រវែង៤៥០ម៉ែត្រ និងទទឹង១០ម៉ែត្រ ដែលជាដីកម្មសិទ្ធិរបស់ខ្ញុំបាទ។ ក្នុងនាមជាម្ចាស់ដីស្របច្បាប់ ខ្ញុំបាទបានសម្បទានដីទំហំទទឹង១០ម៉ែត្រ បណ្តោយ១១០ម៉ែត្រ (នៃដីទំហំ១.៨ ហិចតា ដែលឈ្មោះ ឈរ ស៊ុនលី ចូលមកដណ្តើមកាន់កាប់លើដីខ្ញុំបាទ) ដើម្បីបើកផ្លូវជាប្រយោជន៍ សាធារណៈ និងដើម្បីប្រយោជន៍គណបក្សប្រជាជនកម្ពុជា។
ប្រជាពលរដ្ឋមួយចំនួនយល់ដឹងអំពីច្បាប់ និងម្ចាស់កម្មសិទ្ធិលើដី បានព្រមព្រៀងសះជា ហើយម្ចាស់ដីនាពេលកន្លងមកក៏ទទួលបានដីកាកែសម្រួលរក្សាការពារពីតុលាការ និងបន្តនីតិវិធីការពារសិទ្ធិរបស់ខ្លួនជាម្ចាស់ដីរហូតទទួលបានប័ណ្ណជាម្ចាស់កាន់កាប់ដីថែមទៀតផង៕
