សាម៉ាកាន់៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) និងប្រធានាធិបតីចិន លោក ស៊ី ជីនភីង (Xi Jinping) នឹងពិភាក្សាគ្នាលម្ពិតអំពីបញ្ហាសង្គ្រាមនៅអ៊ុយក្រែន ក៏ដូចជាបញ្ហាជម្លោះកោះតៃវ៉ាន់ នៅពេលមេដឹកនាំទាំងពីរជួបគ្នានៅទីក្រុងសាម៉ាកន់ ប្រទេសអ៊ូសបេគីស្ថាន នៅថ្ងៃទី១៥ ខែកញ្ញា ឆ្នាំ២០២២នេះ។
ជំនួយការប្រធានាធិបតីរុស្ស៊ី លោក យូរី អ៊ូសាកូវ (Yury Ushakov) បាននិយាយកាលពីថ្ងៃអង្គារថា មេដឹកនាំទាំងពីរនឹងជួបពិភាក្សាគ្នា ដាច់ដោយឡែក ក្រៅកិច្ចប្រជុំកំពូលនៃអង្គការសហប្រតិបត្តិការសៀងហៃ ប្រារព្ធឡើនាទីក្រុងសាម៉ាកាន់ ដែលមានមេដឹកមកពីបណ្តាប្រទេសផ្សេងទៀតចូលរួម។
លោកបានបញ្ជាក់ថា «ដោយមើលឃើញពីស្ថានភាពអន្តរជាតិបច្ចុប្បន្ន កិច្ចប្រជុំនេះពិតជាមានលក្ខណៈពិសេសប្លែក។ មេដឹកនាំទាំងពីរនឹងលើកអំពីរបៀបវារៈប្រជុំទ្វេភាគី ក៏ដូចជាប្រធានបទសំខាន់ៗជុំវិញបញ្ហាក្នុងតំបន់ និងនៅលើឆាកអន្តរជាតិ»។
គេរំពឹងថា ប្រធានបទធំមួយក្នុងអំឡុងពេលកិច្ចប្រជុំរបស់មេដឹកនាំទាំងពីរ គឺសង្គ្រាមអ៊ុយក្រែន អាចត្រូវលោក វ៉្លាឌីមៀ ពូទីន និងលោក ស៊ី ជីនភីង លើកមកពិភាក្សាគ្នាយ៉ាងស៊ីជម្រៅ។
លោក យូរី អ៊ូសាកូវ ក៏បានកត់សម្គាល់ផងដែរថា រដ្ឋាភិបាលទីក្រុងប៉េកាំងកំពុងតែអនុវត្តគោលនយោបាយប្រកបដោយតុល្យភាពយ៉ាងខ្លាំង លើបញ្ហាសង្គ្រាមនៅអ៊ុយក្រែននេះ។
លោកពន្យល់បន្ថែមថា រដ្ឋាភិបាលចិន បានបញ្ជាក់ជំហររួចហើយថា ខ្លួនយល់យ៉ាងច្បាស់អំពីហេតុផល ដែលបង្ខំឲ្យរុស្ស៊ីធ្វើប្រតិបត្តិការយោធាពិសេស ប្រឆាំងនឹងរដ្ឋាភិបាលអ៊ុយក្រែន។
លោកជំនួយការប្រធានាធិបតីរុស្ស៊ីរូបនេះ បានបន្តទៀតថា កិច្ចពិភាក្សារវាងមេដឹកនាំទាំងពីរនឹងបង្កើតបានជាទំនាក់ទំនងផ្ទាល់ខ្លួន ដែលគេរំពឹងទុកជាយូរមកហើយ បន្ទាប់ពីបុរសពីររូបនេះ បានជួបគ្នា នៅខែកុម្ភៈ ឆ្នាំ២០២២ ឯពិធីបើកការប្រកួតកីឡាអូឡាំពិករដូវរងា នៅក្នុងប្រទេសចិន។
ដោយមើលឃើញពីទំនាក់ទំនងដ៏កក់ក្តៅ នាពេលបច្ចុប្បន្នរវាងរដ្ឋាភិបាលទីក្រុងមូស្គូ និងរដ្ឋាភិបាលទីក្រុងប៉េកាំង លោក យូរី អ៊ូសាកូវ បានរំពឹងទុកថា ភាគីទាំងពីរនឹងវាយតម្លៃជាវិជ្ជមាននូវភាពជាដៃគូយុទ្ធសាស្ត្រ ក្នុងនាមជាប្រទេសចួលរួមបង្កើតសណ្តាប់ធ្នាប់ពិភពលោកថ្មីបែបពហុប៉ូល។
ក្នុងជំនួបនេះ លោក វ៉្លាឌីមៀ ពូទីន និងលោក ស៊ី ជីនភីង ក៏គ្រោងនឹងពិភាក្សាគ្នាអំពីបញ្ហាដែនដីកោះតៃវ៉ាន់ បន្ទាប់ពីប្រធានសភាប្រជាជនចិន លោក លី ឆានស៊ូ (Li Zhanshu) បានជួបមន្ត្រីជាន់ខ្ពស់រុស្ស៊ី នៅក្នុងជំនួបនាពេលថ្មីៗនេះ ឯវេទិកាសេដ្ឋកិច្ច នាទីក្រុង វ៉្លាឌីវ៉ូស្តុក (Vladivostok) ស្ថិតនៅភាគខាងកើតរុស្ស៊ី។
ភាពតានតឹងជុំវិញបញ្ហាកោះតៃវ៉ាន់ កំពុងតែកើនឡើងរៀងរាល់ថ្ងៃ ចាប់តាំងពីប្រធានសភាអាមេរិក លោកស្រី ណាន់ស៊ី ប៉េឡូស៊ី (Nancy Pelosi) ធ្វើទស្សនកិច្ចក្រុងតៃប៉ិ កាលពីដើមខែសីហា ឆ្នាំ២០២២ ហើយបង្កឲ្យរដ្ឋាភិបាលក្រុងប៉េកាំង ច្រឡោតខឹងរដ្ឋាភិបាលអាមេរិកយ៉ាងខ្លាំង។
នៅក្នុងជំនួបនេះដែរ លោក យូរី អ៊ូសាកូវ បាននិយាយបង្ហើបថា មេដឹកនាំប្រទេសចិន និងមេដឹកនាំប្រទេសរុស្ស៊ី មិនមានគម្រោងចុះហត្ថលេខាលើឯកសារណាមួយឡើយ ដោយលោកលើកហេតុផលថា វាគ្រាន់តែជាកិច្ចពិភាក្សាការងាររបស់ថ្នាក់ដឹកនាំ។
កិច្ចប្រជុំកំពូលនាទីក្រុង សាម៉ាកាន់ ក្នុងថ្ងៃនេះ នឹងមានការចូលរួមពីមន្ត្រីជាន់ខ្ពស់ និងប្រមុខរដ្ឋមួយចំនួន រួមទាំងប្រធានាធិបតីទួរគី លោក រ៉េស៊ីប តៃយីប អេឌូហ្គាន់ (Recep Tayyip Erdogan) ដែលត្រូវបានគេរាយការណ៍ថា មានបំណងចង់ដើរតួសម្របសម្រួល ដើម្បីបញ្ឈប់សង្គ្រាមនៅអ៊ុយក្រែន៕
