អាមេរិក៖ ម្ចាស់ឆាណែលយូធូប ឈ្មោះ រ៉ាយអិន វើល (Ryan’s World) របស់ជាក្មេងប្រុសតូចម្នាក់ ជាតារាឯកលេងកុក្កតា ទទួលបានការចាប់អារម្មណ៍ យ៉ាងខ្លាំង ពីបណ្តាកុមារតូចៗ នៅទូទាំងពិភពលោក រហូតធ្វើឲ្យក្មេងប្រុសម្នាក់នេះ រកប្រាក់ចំណូល បានជាងមួយរយលានដុល្លារ។
កុមារាឈ្មោះ រ៉ាយអិន កាជី (Ryan Kaji) ក្រោមការជួយជ្រោមជ្រែងពីឪពុកម្តាយ បានធ្វើឲ្យឆាណែលរបស់ខ្លួន ជាប់ក្នុងបញ្ជីឈ្មោះឆាណែលធំៗទាំង៥ នៅលើយូធូប កាលពីឆ្នាំ២០១៦ គឺមានប្រជាប្រិយភាពខ្ពស់ជាងឆាណែលយូធូបរបស់តន្រ្តីករល្បីៗ នៅលើពិភពលោកទៅទៀត។
កុមារា រ៉ាយអិន កាជី កើតនៅថ្ងៃទី០៦ ខែតុលា ឆ្នាំ២០១១ ក្នុងរដ្ឋតិចសាស់ សហរដ្ឋអាមេរិក មានឪពុកមានដើមកំណើតជប៉ុន ឈ្មោះ ស៊ីអុន គួម (Shion Guom) និងម្តាយមានដើមកំណើតវៀតណាម ឈ្មោះ ខៀវលួន ធីង្វៀង (Kieu-Loan Thi Nguyen) ហៅ លួន កាជី (Loan Kaji)។
គិតត្រឹមខែធ្នូ ឆ្នាំ២០២០នេះ ក្មេងប្រុសតូច ឈ្មោះ រ៉ាយអិន កាជី អាយុ៩ឆ្នាំ មានប្រាក់ចំណូលជាង១១២លានដុល្លារ គឺបានពីការផ្សាយពាណិជ្ជកម្មលើឆាណែលយូធូបផ្សេងៗគ្នា និងការបណ្តាក់ទុនផ្សេងទៀត ដែលបង្កើតឡើងដោយកេរ្តិ៍ឈ្មោះល្បីល្បាញរបស់ខ្លួន។
ចំណុចសំខាន់ដ៏លេចធ្លោរភាគច្រើន នៅលើឆាណែល រ៉ាយអិន វ៊ើល គឺអំពីកុមារា រ៉ាយអិន កាជី លេងតុក្កតា និងពិនិត្យមើលប្រដាប់ប្រដាក្មេងលេងដទៃទៀត។
ឆាណែលរបស់ រ៉ាយអិន កាជី ចាប់តាំងពីខែមីនា ឆ្នាំ២០១៥ ដល់ខែធ្នូ ឆ្នាំ២០២០ មានសាប់ស្ក្រាយប៊ើ ជាង២៨ លាននាក់ គឺកើនឡើងថ្មីចំនួន ១១,០០០ នាក់ ហើយជារៀងរាល់ថ្ងៃទទួលបានការចូលទស្សនាជាង៤២ពាន់លានដង ដែលជាចំនួនខ្ពស់បំផុតក្នុងរយៈពេលដ៏ខ្លី បើប្រៀបធៀបជាមួយឆាណែលយូធូបល្បីៗដទៃទៀត។
គ្រាន់តែក្នុងមួយថ្ងៃសោះ ឆាណែលនេះ មានការចូលទស្សនាពីមនុស្សនៅជុំវិញពិភពលោកចំនួន២២លានដង ហើយជាលទ្ធផល អាចរកចំណូលបានប្រហែល៨៨.០០០ ដុល្លារក្នុងមួយថ្ងៃ ស្មើនឹង៣២ លានដុល្លារក្នុងមួយឆ្នាំ បានមកពីការផ្សាយពាណិជ្ជកម្មលើវីដេអូ។
ត្រឹមអាយុ៩ឆ្នាំ កុមារា រ៉ាយអិន កាជី បានស្ថិតក្នុងចំណោមអ្នករកប្រាក់ចំណូលពីយូធូបច្រើនជាងគេប្រចាំឆ្នាំជាប់ៗគ្នា។ នៅឆ្នាំ២០១៧ រកបាន ១១ លានដុល្លារ។ នៅឆ្នាំ ២០១៨ រកបាន ២២ លានដុល្លារ។ នៅឆ្នាំ ២០១៩ រកបាន ២៦ លានដុល្លារ។
តើអ្នកណាជាឪពុកម្តាយរបស់កុមារា រ៉ាយអិន កាជី ជានរណា និងមានដើមកំណើតពីប្រទេសណា?
លោកស្រី លួន កាជី អាយុ៣៨ឆ្នាំ មានឈ្មោះដើមជាភាសាវៀតណាម ខៀវលួន ធីង្វៀង កើតនៅឆ្នាំ១៩៨៤ និងធំដឹងក្តីនៅក្រុងហ៊ូស្តុន រដ្ឋតិចសាស់ ដែលជាកូនស្រីរបស់ជនអន្តោប្រវេសន៍វៀតណាម ទៅរស់នៅក្នុងសហរដ្ឋអាមេរិក។
នៅឆ្នាំ២០០២ ក្នុងអាយុ១៨ឆ្នាំ លោកស្រី ខៀវលួន ធីង្វៀង ហៅ លួន កាជី ត្រូវបានចាប់ខ្លួន និងប្រឈមមុខជាប់គុកពីរខែ ពីបទលួចសម្លៀកបំពាក់ ដែលមានតម្លៃ ៩៣ដុល្លារពីហាងមួយកន្លែង ស្ថិតនៅក្នុងក្រុង ហ៊ូស្តុន ប៉ុន្តែបានរួចខ្លួនមិនជាប់គុក ដោយគ្រាន់តែរងការពិន័យជាប្រាក់ចំនួន១៥០ដុល្លារ និងព្យួរទោស ក្នុងរយៈពេលប្រាំមួយខែ។ ប៉ុន្តែក្នុងឆ្នាំ២០០៣ នាងបានប្រព្រឹត្តិល្មើស ក្នុងដំណាក់កាលទោសព្យួរប្រាំមួយខែ ដូច្នេះតុលាការបានផ្តាន្ទាទោសឲ្យជាប់ពន្ធនាគាររយៈពេលមួយខែ។
បន្ទាប់ពីត្រូវបានជាប់ពន្ធនាគារអស់រយៈពេល៣ខែហើយ លោកស្រីបានទៅបន្តការសិក្សាផ្នែកបច្ចេកវិទ្យា នៅសាកលវិទ្យាល័យ តិចសាស់ ដែលនៅទីនោះ ក្នុងឆ្នាំ២០០៩ នាងបានជួបនិស្សិតជប៉ុនម្នាក់ឈ្មោះ ស៊ីអុន គួន មានអាយុតិចជាងនាងបួនឆ្នាំ។
អ្នកទាំងពីរបានស្រលាញ់គ្នា និងរៀបការ ក្នុងឆ្នាំ២០១៣ គឺក្រោយពេលមានកូនម្នាក់រួចទៅហើយ គឺកូនប្រុសឈ្មោះ រ៉ាយអិន កាជី កើតក្នុងឆ្នាំ២០១១ ដែលត្រឹមអាយុ៩ឆ្នាំសោះ កូនប្រុសម្នាក់នេះកំពុងតែនាំទ្រព្យសម្បត្តិដ៏មហាសាលដល់ឪពុកម្តាយ គិតត្រឹមខែទីធ្នូ ឆ្នាំ២០២០ អាចរកប្រាក់បានជាង១១២លានដុល្លារ និងមានកេរ្តិ៍ឈ្មោះល្បីពេញពិភពលោក។
ឆាណែលឈ្មោះ រ៉ាយអិន វ៊ើល តែងតែបង្ហោះវីដេអូថ្មីរាល់ថ្ងៃ ដូចជាវីដេអូមួយ មានចំណងជើងថា ស៊ុតយក្សធ្វើឲ្យផ្អើលភិភពប្រកួតប្រជែងតុក្កតា ដោយមានអ្នកចូលមើលជាង២០០០លាននាក់ គិតត្រឹមចុងខែវិច្ឆិកា ឆ្នាំ២០២០ រហូតធ្វើឲ្យក្លាយជាវីដេអូមួយនេះ ជាប់ឈ្មោះក្នុងចំណោមវីដេអូចំនួន៦០ ដែលមានគេមើលច្រើនបំផុត នៅលើយូធូប។
ជាពិសេសេ ឆាណែលនេះ បានជាប់ឈ្មោះក្នុងតារាង ឆាណែលយូធូប ដែលទទួលបានការគាំទ្រច្រើនជាងគេបំផុត ទាំង១០០ នៅសហរដ្ឋអាមេរិក ផងដែរ។
តាមរយៈការរកប្រាក់បានងាយៗ ឆាណែលនិយាយតែភាសាអង់គ្លេសនេះ ដែលមានកុមារា រ៉ាយអិន កាជី ជាតួឯក មានឪពុកឈ្មោះ ស៊ីអុន គួន និងម្តាយឈ្មោះ ខៀវលួន ធីង្វៀង ហៅ លួន កាជី ចូលរួមផងដែរ ឥឡូវនេះក៏មានវីដេអូ និយាយជាភាសាដទៃទៀតដែរ ដូចជាភាសាអេស្ប៉ាញ និងភាសាជប៉ុន ជាដើម៕