វ៉ាស៊ីនតោន៖ រដ្ឋាភិបាលចិន បានចោទប្រកាន់សហរដ្ឋអាមេរិកថា កាលពីឆ្នាំ២០២២ បានបង្ហោះបាឡុងកម្ពស់ខ្ពស់ជាង១០ដង លើទឹកដីរបស់ចិនដោយគ្មានសុំការអនុញ្ញាត។
ការចោទប្រកាន់របស់ចិន កាលពីថ្ងៃច័ន្ទ បានកើតឡើងប៉ុន្មានថ្ងៃបន្ទាប់ពីសហរដ្ឋអាមេរិកបានបាញ់ទម្លាក់បាឡុងចារកម្មចិន រដ្ឋាភិបាលក្រុងប៉េកាំងបានទទូចថា វាជាយានសម្រាប់ព្យាករណ៍អាកាសធាតុ។
អ្នកនាំពាក្យក្រសួងការបរទេសចិន លោក វ៉ាង វ៉េនពីន (Wang Wenbin) បាននិយាយនៅក្នុងសន្និសីទសារព័ត៌មានមួយថា «វាជារឿងធម្មតាទេសម្រាប់បាឡុងរបស់សហរដ្ឋអាមេរិក ហោះចូលដែនអាកាសរបស់ប្រទេសដទៃដោយខុសច្បាប់»។
លោកបាននិយាយទៀតថា «ចាប់តាំងពីឆ្នាំមុនមក បាឡុងកម្ពស់ខ្ពស់របស់អាមេរិក បានហោះហើរដោយខុសច្បាប់លើដែនអាកាសរបស់ប្រទេសចិនច្រើនជាង១០ដង ដោយគ្មានការយល់ព្រមពីអាជ្ញាធរចិន»។
បន្ទាប់ពីអាមេរិកបាញ់ទម្លាក់បាឡុងចិន កាលពីសប្តាហ៍មុន រដ្ឋមន្ត្រីការបរទេសអាមេរិកលោក អែនធូនី ប្លីងគិន (Antony Blinken) បានលុបចោលដំណើរទស្សនកិច្ចផ្លូវការទៅកាន់ទីក្រុងប៉េកាំង ដើម្បីពិភាក្សារកដំណោះស្រាយចំពោះភាពតានតឹងផ្នែកការទូតរវាងប្រទេសទាំងពីរ។
សូមរំឭកថា កាលពីព្រឹកថ្ងៃទី១៣ ខែកុម្ភៈ ឆ្នាំ២០២៣ យោធាសហរដ្ឋអាមេរិកបានបាញ់ទម្លាក់យានមួយគ្រឿងទៀត ដែលកំពុងហោះនៅជិតព្រំដែនប្រទេសកាណាដា។
មន្ត្រីយោធាអាមេរិក បានស្រង់យកបំណែករបស់បាឡុងចេញពីមហាសមុទ្រ ដើម្បីពិនិត្យមើលទិន្នន័យឈ្លបយការណ៍។
កាលពីថ្ងៃសុក្រ ប្រធានាធិបតីអាមេរិក លោក ចូ បាយដិន (Joe Biden) បានបញ្ជាឲ្យបាញ់ទមទម្លាក់យានមួយគ្រឿង ហោះនៅលើរដ្ឋ អាឡាស្កា ហើយបន្ទាប់មក កាលពីថ្ងៃសៅរ៍ យានស្រដៀងគ្នាមួយទៀត ត្រូវបានបាញ់ទម្លាក់នៅភាគពាយ័ព្យប្រទេសកាណាដា៕
