ប៉ារីស៖ បាតុកររាប់ម៉ឺននាក់បានដើរដង្ហែក្បួនតវ៉ាក្នុងទីក្រុងប៉ារីស ដើម្បីប្រឆាំង និងបញ្ចេញកំហឹងកាន់តែខ្លាំងឡើងចំពោះអតិផរណា បន្ទាប់ពីបានកូដកម្មនៅក្នុងរោងចក្រចម្រាញ់ប្រេង ដែលបណ្តាលឲ្យមានការខ្វះខាតប្រេងឥន្ធនៈនៅទូទាំងប្រទេសបារាំង។
បាតុកម្មប្រឆាំងនឹងការកើនឡើងនៃការចំណាយសម្រាប់រស់នៅប្រចាំថ្លៃ កាលពីថ្ងៃអាទិត្យ ដឹកនាំដោយក្រុមប្រឆាំងនយោបាយឆ្វេងនិយម ដើម្បីបង្ហាញកំហឹងប្រឆាំងនឹងការឡើងថ្លៃ និងដើម្បីបង្កើនសម្ពាធលើរដ្ឋាភិបាលរបស់ប្រធានាធិបតីបារាំង លោក អ៊ីម៉ានូអែល ម៉ាក្រុង (Emmanuel Macron)។
បាតុករបានអំពាវនាវឲ្យមានការវិនិយោគដ៏ធំដើម្បីទប់ទល់វិបត្តិអាកាសធាតុ និងឲ្យរដ្ឋាភិបាលបារាំងចាត់វិធានការសង្គ្រោះបន្ទាន់ទប់ទល់នឹងតម្លៃខ្ពស់ រួមទាំងបញ្ឈប់តម្លៃថាមពល ទំនិញសំខាន់ៗ និងបន្ថយការយកពន្ធកាន់តែច្រើនលើប្រាក់ចំណេញសាជីវកម្ម។
ក្រុមបាតុករខ្លះបានពាក់អាវកាក់ផ្កាពណ៌លឿង ដែលជានិមិត្តសញ្ញានៃការតវ៉ាប្រឆាំងរដ្ឋាភិបាលដោយហិង្សាជាញឹកញាប់ ក្នុងឆ្នាំ២០១៨ ដែលបានអង្រួនរដ្ឋាភិបាលកណ្តាលនិយមរបស់បារាំង។
ក្រុមប្រឆាំងលោក អ៊ីម៉ានូអែល ម៉ាក្រុង សង្ឃឹមថា សន្ទុះនៃការតវ៉ានឹងកើនឡើងដោយសារការប្រឈមមុខដាក់គ្នានៅរោងចក្រចម្រាញ់ប្រេង ដែលបានចាប់ផ្តើមធ្វើកូដកម្ម តាំងពីចុងខែកញ្ញា ឆ្នាំ២០២២នេះ។
កូដកម្មនៅតាមគ្រឹះស្ថានដឹកជញ្ជូន បានអំពាវនាវ នៅដើមសប្តាហ៍មុន ធ្វើឲ្យរាំងស្ទះដល់រោងចក្រចម្រាញ់ប្រេង និងស្ថានីយចាក់ប្រេងនានា ដែលបង្កឲ្យមានការខ្វះខាតប្រេង ដល់កម្មកររាប់លាននាក់ និងអ្នកបើកបរយានយន្តផ្សេងទៀត ដែលពឹងផ្អែកលើយានជំនិះរបស់ពួកគេសម្រាប់ធ្វើដំណើរ។
មេដឹកនាំបាតុកម្មបាននិយាយថា មនុស្សជាង១សែនបួនម៉ឺននាក់ បានចូលរួមដង្ហែក្បួនតវ៉ាកាលពីថ្ងៃអាទិត្យ។ ចំណែកនគរបាលបានព្យាករណ៍ថា មានមនុស្សប្រហែល៣សែននាក់នឹងចូលរួមបាតុកម្មនេះ។
ក្រុមបាតុករ បាននិយាយចោទប្រកាន់ថា ការដឹកនាំរបស់លោក អ៊ីម៉ានូអែល ម៉ាក្រុង កំពុងធ្វើឲ្យប្រទេសបារាំងធ្លាក់ចូលភាពវឹកវរ។
សហជីពបារាំងជាច្រើន បានប្រកាសទិវាជាតិនៃកូដកម្ម កាលពីថ្ងៃអង្គារ ដែលត្រូវបានគេរំពឹងថា នឹងប៉ះពាល់ដល់ការដឹកជញ្ជូន និងវិស័យសាធារណៈ។
រោងចក្រចម្រាញ់ប្រេងចំនួនបួន ក្នុងចំណោមរោងចក្រចម្រាញ់ប្រេងទាំងប្រាំពីរ របស់ប្រទេសបារាំង ដែលទាំងអស់ជាកម្មសិទ្ធិរបស់ក្រុមហ៊ុនតូតាល់ មានមូលដ្ឋាននៅទីក្រុងប៉ារីស នៅតែត្រូវបានបិទទ្វារ កាលពីថ្ងៃអាទិត្យ។
ក្រុមហ៊ុនបារាំងបានប្រកាស កាលពីថ្ងៃសុក្រថា ខ្លួនឈានដល់កិច្ចព្រមព្រៀងប្រាក់ឈ្នួលជាមួយសហជីពធំជាងគេទាំងពីរ តំណាងឲ្យបុគ្គលិកនៅរោងចក្រចម្រាញ់ប្រេង ដោយបង្កើនក្តីសង្ឃឹមនៃការបញ្ចប់ការប្រឈមមុខដាក់គ្នា។ ប៉ុន្តែ មេដឹកនាំសហជីព បានបដិសេធមិនទទួលយកឡើយ ដោយសមាជិករបស់ខ្លួននៅតែបន្តរក្សាលក្ខខណ្ឌទាមទារដដែល។
រដ្ឋមន្ត្រីក្រសួងហិរញ្ញវត្ថុបារាំង បានបរិហារការបន្តធ្វើកូដកម្ម កាលពីថ្ងៃអាទិត្យថា ជាការមិនអាចទទួលយកបាន ដោយក្រុមបាតុករកំពុងយកប្រទេសបារាំងជាចំណាប់ខ្មាំង៕
