ទីក្រុងកៀវ៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សឺឡឹនស្គី (Volodymyr Zelensky) បាននិយាយថា កងទ័ពរបស់លោកដណ្តើមយកមកវិញនូវទឹកដីទំហំ៦,០០០គីឡូម៉ែត្រក្រឡា ពីកងទ័ពរុស្ស៊ី ក្នុងការវាយបកក្នុងខែកញ្ញានេះ ដែលធ្វើឲ្យកងទ័ពរុស្ស៊ីបរាជ័យបាក់ទ័ពរត់ទៅស្រុកវិញ។
លោកប្រធានាធិបតី បានថ្លែងនៅក្នុងសុន្ទរកថាប្រចាំថ្ងៃ កាលពីថ្ងៃចន្ទថា «ចាប់តាំងពីដើមខែកញ្ញាមក ទាហានរបស់យើងបានរំដោះទឹកដីអ៊ុយក្រែនទំហំ៦,០០០គីឡូម៉ែត្រក្រឡា នៅភាគខាងកើត និងភាគខាងត្បូង ហើយយើងកំពុងបន្តរុលទៅមុខទៀត»។
កងទ័ពអ៊ុយក្រែន បានដណ្តើមយកទឹកដីបន្ថែមទៀត កាលពីថ្ងៃចន្ទ ដោយបានរុលទៅកាន់ព្រំដែនភាគឦសាន ហើយបានអះអាងថា កងទ័ពអ៊ុយក្រែនចាប់បានទាហានរុស្ស៊ីជាច្រើននាក់ ធ្វើជាឈ្លើយសឹក។
លោកអភិបាលតំបន់ខាកៀវ (Kharkiv) បាននិយាយថា «នៅចំណុចខ្សែត្រៀមជួរមុខមួយចំនួន អ្នកការពារជាតិរបស់យើង បានទៅដល់ព្រំដែនជាមួយសហព័ន្ធរុស្ស៊ី»។
អ្នកនាំពាពាក្យផ្នែកស៊ើបការណ៍សម្ងាត់របស់យោធាអ៊ុយក្រែន បាននិយាយថា ទាហានរុស្ស៊ីកំកំពុងតែចុះចាញ់យ៉ាងច្រើន ហើយសារភាពថា «ពួកគេយល់ពីពីពក្តីអស់សង្ឃឹមដោយសារស្ថានភាពចាញ់សង្គ្រាម»។
ចំណែកទីប្រឹក្សាប្រធានាធិបតីអ៊ុយក្រែន បាននិយាយថា មានឈ្លើយសឹករុស្ស៊ីច្រើនណាស់ រកកន្លែងដាក់មិនបានទេ។
អ្នកនាំពាក្យផ្នែកចារកម្មយោធាអ៊ុយក្រែន បាននិយាយទៀតថា ឈ្លើយសឹករុស្ស៊ី ត្រូវចាប់ខ្លួនបាននោះ រួមមានមន្ត្រីជាន់ខ្ពស់រុស្ស៊ីផងដែរ។
នៅពេលទង់ជាតិអ៊ុយក្រែនពណ៌ខៀវ និងលឿង បានបណ្តែតខ្លួនលើទីក្រុង ដែលទើបរំដោះបានថ្មីៗ យោធាអ៊ុយក្រែន បាននិយាយថា ខ្លួនបានរំដោះការទីតាំងលំនៅឋានជាង២០កន្លែង ក្នុងរយៈពេលត្រឹមតែ២៤ម៉ោង។
ក្នុងរយៈពេលប៉ុន្មានថ្ងៃថ្មីៗនេះ កងទ័ពអ៊ុយក្រែន ដណ្តើមបានទឹកដីយ៉ាងច្រើនពីទាហានរុស្ស៊ី។
រដ្ឋមន្ត្រីក្រសួងការពារជាតិអ៊ុយក្រែន បាននិយាយថា អ៊ុយក្រែនចាំបាច់ណាស់ត្រូវការពារឲ្យបាននូវទឹកដី ដែលទើបដណ្តើមបានមកវិញ និងប្រុងប្រយ័ត្នចំពោះការវាយបកមកវិញរបស់រុស្ស៊ី ដែលអាចកើតមានលើបណ្តាញផ្គត់ផ្គង់ភស្តុភាអ៊ុយក្រែន។
លោកបាននិយាយទៀតថា ការវាវាយបករបស់កងទ័ពអ៊ុយក្រែន បានប្រព្រឹត្តទៅយ៉ាងល្អជាងការរំពឹងទុក ដោយលោកពណ៌នាថា ជ័យជម្នះនេះដូចជាបាល់រមៀលចុះពីលើកំពូលភ្នំ។
លោកបាននិយាយទៀតថា វាជាសញ្ញាបង្ហាញថា រុស្ស៊ីអាចចុះចាញ់សង្គ្រាមនៅអ៊ុយក្រែន។
ការផ្លាស់ប្តូរភ្លាមៗនូវស្ថានភាពសង្គ្រាម និងជ័យជម្នះរបស់កងទ័ពអ៊ុយក្រែន ទទួលបានការគាំទ្រពីអ្នកសង្កេតការណ៍អន្តរជាតិ ហើយបានព្រមានថា ពេលវេលាដ៏អាក្រក់នៅខាងមុខសម្រាប់កងទ័ពរុស្ស៊ី ជិតចូលមកដល់ហើយ គឺផ្ទុយស្រឡះពីថ្ងៃដំបូងនៃសង្រ្គាម នៅពេលទាហានរុស្ស៊ីកំពុងលើកទ័ពឆ្ពោះទៅកាន់ទីក្រុងកៀវ៕
