ម៉ូស្គូ៖ មន្ត្រីយោធាជាន់ខ្ពស់រុស្ស៊ី និយាយអះអាងថា កងទ័ពរុស្ស៊ី បានកម្ទេចចោលក្រុមទាហានស៊ីឈ្នួល ជាតិហ្សកហ្ស៊ី ដែលកំពុងជួយច្បាំងឲ្យអ៊ុយក្រែន ហើយរងការចោទប្រកាន់ថា ជាប់ពាក់ព័ន្ធក្នុងការសម្លាប់ឈ្លើយសឹករុស្ស៊ី ដោយមិនញញើតដៃ។
អ្នកនាំពាក្យក្រសួងការពារជាតិរុស្ស៊ី លោកឧត្តមសេនីយឯក អ៊ីហ្គរ កូណាហ្សេនកូវ (Igor Konashenkov) បាននិយាយា នៅថ្ងៃទី២៦ ខែមិថុនា ឆ្នាំ២០២២ថា ក្នុងចម្ងាយដីបីគីឡូម៉ែត្រពីរោងចក្រចម្រាញ់ប្រេងមួយ ស្ថិតក្នុងសាធារណរដ្ឋប្រជាមានិតឡលូហាន់ (Luhansk) អង្គភាពរុស្ស៊ី បានកម្ទេចចោលក្រុមសកម្មប្រយុទ្ធ និងជាក្រុមស៊ើបការណ៍ចំនួនពីរក្រុម នៃទាហានស៊ីឈ្នួលបរទេស ដែលមានចំនួនសរុប១៤នាក់ ជាជនជាតិហ្សកហ្ស៊ី។
យោងតាមអ្នកនាំពាក្យដដែលនេះ បានអះអាចទៀតថា មានពលរដ្ឋមកពីបណ្តាប្រទេសអ៊ឺរ៉ុបខាងលិចជាច្រើននាក់ទៀត ជាទាហានស៊ីឈ្នួល ក៏ស្ថិតនៅក្នុងកងពលរបស់ទាហានហ្សកហ្ស៊ីនេះដែរ ត្រូវកងទ័ពរុស្ស៊ីកម្ទេចចោលដូចគ្នា។
លោកឧត្តមសេនីយឯក អ៊ីហ្គរ កូណាហ្សេនកូវ បានចោទប្រកាន់ក្រុមទាហានបរទេសទាំងអស់នេះថា ជាពួកសកម្មប្រយុទ្ធហ្សកហ្ស៊ី ដែលមានជាប់ពាក់ព័ន្ធនឹងការធ្វើទារុណកម្មដ៏ឃោរឃៅ និងការសម្លាប់ទាហានឈ្លើយសឹករុស្ស៊ី នៅជិតទីក្រុងគៀវ កាលពីក្នុងខែមីនាកម្លងមកនេះ។
ចាប់តាំងពីការចាប់ផ្តើមនៃការវាយលុករបស់យោធារុស្ស៊ីនៅអ៊ុយក្រែន នៅចុងខែកុម្ភៈ រដ្ឋាភិបាលទីក្រុងមូស្គូ និងគៀវ បាននិងកំពុងចោទប្រកាន់គ្នាទៅវិញទៅមក ពីបទរំលោភបំពាន និងធ្វើទារុណកម្ម ក៏ដូចជាអំពើឃោរឃៅលើជនស៊ីវិល។ កាលពីខែឧសភា គណៈកម្មាធិការស៊ើបអង្កេតរបស់រុស្ស៊ី បាននិយាយថា ខ្លួនកំពុងពិនិត្យមើលវីដេអូបផ្សព្វផ្សាយនៅលើប្រព័ន្ធផ្សព្វផ្សាយសង្គម ដែលបង្ហាញពីទាហានស៊ីឈ្នួលហ្សកហ្ស៊ីម្នាក់ បានវាយធ្វើទារុណកម្មទាហានឈ្លើយសឹករុស្ស៊ី ដែលត្រូវពួកគេចាប់ខ្លួនបាននៅក្នុងសមរភូមិ។
មន្ត្រីសិទ្ធិមនុស្សកំពូលរបស់រុស្ស៊ី ក្នុងខែនេះ បានសម្តែងការព្រួយបារម្ភជុំវិញការធ្វើទារុណកម្មឈ្លើយសឹករុស្ស៊ី ដែលត្រូវចាប់ខ្លួនបាន នៅក្នុងសង្គ្រាមអ៊ុយក្រែន ហើយនិយាយចោទប្រកាន់កាកបាទក្រហមអន្តរជាតិថា មិនបានផ្តល់ព័ត៌មានណាមួយអំពីលទ្ធផលនៃការពិនិត្យមើលលក្ខខណ្ឌ ដែលទាហានឈ្លើយសឹករុស្ស៊ី កំពុងជាប់ពន្ធនាគារអ៊ុយក្រែនឡើយ។
កងទ័ពរុស្ស៊ីបានឈ្លាពានប្រទេសអ៊ុយក្រែន កាលពីចុងខែកុម្ភៈ បន្ទាប់ពីរស្ស៊ីចោទប្រកាន់អ៊ុយក្រែនថា ការបរាជ័យ ក្នុងការអនុវត្តលក្ខខណ្ឌនៃកិច្ចព្រមព្រៀងទីក្រុង មីន (Minsk) ប្រទេសប៉ូឡូញ ដែលបានចុះហត្ថលេខាជាលើកដំបូងនៅក្នុងឆ្នាំ២០១៤ និងការទទួលស្គាល់របស់រដ្ឋាភិបាលទីក្រុងម៉ូស្គូចំពោះសាធារណរដ្ឋដូណែត (Donetsk) និងសាធារណរដ្ឋ លូហាន់ (Luhansk) ក្នុងតំបន់ដូនបាស់ (Donbass)។
ចាប់តាំងពីពេលនោះមក វិមានក្រឹមឡាំងបានទាមទារឲ្យអ៊ុយក្រែនប្រកាសជាផ្លូវការថា ខ្លួនជាប្រទេសអព្យាក្រឹត ដមិនចូលរួមក្នុងប្លុកយោធាណាតូ ដែលដឹកនាំដោយសហរដ្ឋអាមេរិក។ ចំណែករដ្ឋាភិបាលទីក្រុងគៀវ បានទទូចថា ការវាយលុកក្នុងសង្គ្រាមឈ្លានពានរបស់រុស្ស៊ី គឺជាការបង្កហេតុទាំងស្រុង ហើយបានបដិសេធការអះអាងថា ខ្លួនមានគម្រោងដណ្តើមយកសាធារណរដ្ឋបំបែកខ្លួនពីអ៊ុយក្រែនទាំងពីរខាងលើមកវិញដោយកម្លាំងយោធា៕
