ភ្នំពេញ ៖ តាមការបញ្ជាក់ របស់លោក ម៉េត មាសភក្ដី អ្នកនាំពាក្យរដ្ឋបាល រាជធានីភ្នំពេញ បានអោយដឹងថា បច្ចុប្បន្ន រដ្ឋបាលរាជធានីភ្នំពេញ បានរៀបចំផ្ទៃដី ទំហំប្រមាណ ១០ ហិកតា និងឡ ជាបច្ឆាបច្ចេកទេស ស្តង់ដារចំនួន៦ សម្រាប់ត្រៀមបូជាសព អ្នកស្លាប់ដោយសារជំងឺកូវីដ-១៩នេះ គឺស្ថិតក្នុងស្រុកឱរ៉ាល់ នៃខេត្តកំពង់ស្ពឺដូចដែលបាន សិក្សា និងគិតគូរនោះ។
លោក ម៉េត មាសភក្ដី បានឱ្យដឹងនៅព្រឹកថ្ងៃទី១២មីនាថាៈ ចំពោះមុខ ក្រោយពីទទួលបានបទបញ្ជា របស់សម្ដេចតេជោ ហ៊ុន សែន នាយករដ្ឋមន្ត្រី និងការដឹកនាំបញ្ជា ដោយផ្ទាល់ពីលោក ឃួង ស្រេង អភិបាលរាជធានីភ្នំពេញ ភ្លាមៗ អាជ្ញាធរ និងផ្នែកជំនាញ ពាក់ព័ន្ធបានគិតគូរ ជ្រើសរើសទីតាំង សម្រាប់រៀបចំធ្វើ ជាកន្លែងបូជាសព អ្នកស្លាប់ដោយសារជំងឺកូវីដ១៩ ដោយគិតគូរពីសុវត្ថិភាពនិងមិនឱ្យ ប៉ះពាល់ដល់ ប្រជាពលរដ្ឋនោះ ទើបពិនិត្យ និងសម្រេចឃើញថា មានតែទីតាំងមូលដ្ឋាន ក្នុងស្រុកឱរ៉ាល់ នៃខេត្តកំពង់ស្ពឺនោះទេ ដែលផ្ដល់សុវត្ថិភាព និងជាជម្រើសល្អនៅក្នុងការ បង្កើតឱ្យមាន ជាទីតាំងសម្រាប់បូជាសព អ្នកដែលស្លាប់ដោយសារ ជំងឺកូវីដ១៩នេះ ដោយសារទីនោះ មិនប៉ះពាល់ដល់ការរស់នៅរបស់ប្រជាពលរដ្ឋឡើយ។
លោកបន្ថែមថាៈ ទោះបីមកដល់ពេលនេះ ការរីករាលដាល នៃជំងឺកូវីដ១៩ នៅតែបន្តមាន និងមានអ្នកស្លាប់ម្នាក់ក្ដី ក៏ភូមិសាស្ត្ររាជធានីភ្នំពេញ មិនត្រូវបានប្រកាសបិទ ឬផ្អាកចរាចរណ៍ តំបន់ណាឡើយ លើកលែងតែទីតាំង ប្រមាណជា ១០០ ទីតាំងដែលមាន ដូចជាផ្ទះ ឬខុនដូជាដើម មានអ្នកពាក់ព័ន្ធ កំពុងរស់នៅ និងធ្វើចត្តាឡីស័កប៉ុណ្ណោះ ដែលត្រូវបានហ៊ុមព័ទ្ធទីនោះ ព្រោះថា រដ្ឋបាលរាជធានីភ្នំពេញបានត្រៀមលក្ខណៈរួច ជាស្រេច ចំពោះការដោះស្រាយ សភាពការណ៍បន្ទាន់ៗ ទាំងការរៀបចំទីតាំងធ្វើចត្តាឡីស័ក ទីតាំងព្យាបាល ពិសេសគឺការការពារសន្តិសុខ សណ្ដាប់ធ្នាប់ តំបន់ពាក់ព័ន្ធទាំងនោះ៕
