កំពង់ចាម៖ លោក អ៊ុន ចាន់ដា អភិបាលខេត្តកំពង់ចាម បានណែនាំដល់មន្ត្រីពាក់ព័ន្ធ ឲ្យត្រួតពិនិត្យឡេីងវិញ ដើម្បីមានចំណាត់ការ ចំពោះបុគ្គលមួយចំនួន ដែលបង្កើតក្រុមហ៊ុន ដេីម្បីទាមទារយកលុយទឹកតែ ហើយថែមទាំងបង្កការអុកឡុក ក្នុងដំណើរការដេញថ្លៃគម្រោងមូលនិធិឃុំ-សង្កាត់ នៅក្នុងខេត្ត។
លោកអភិបាលខេត្ត បានព្រមានយ៉ាងដូច្នេះ នៅក្នុងកិច្ចប្រជុំសាមញ្ញលេីកទី២៣ អាណត្តិទី៣ របស់ក្រុមប្រឹក្សាខេត្តកំពង់ចាម នាព្រឹកថ្ងៃទី៦ ខែមេសា ឆ្នាំ២០២១ នាសាលាខេត្តកំពង់ចាម។
ក្នុងកិច្ចប្រជុំនេះ លោក អ៊ុន ចាន់ដា បានណែនាំដល់មន្ត្រីពាក់ព័ន្ធ ជាពិសេសក្រុមប្រឹក្សាឃុំ-សង្កាត់ទាំងអស់ ដែលជាម្ចាស់គម្រោងមូលនិធិឃុំ-សង្កាត់ ត្រូវត្រួតពិនិត្យឲ្យបានច្បាស់លាស់ជាមុនសិន មុននឹងចុះហត្ថលេខាទទួលយកនូវគម្រោងសាងសង់អ្វីមួយពីម្ចាស់ក្រុមហ៊ុនទទួលម៉ៅការ ដេីម្បីចៀសវាងការខូចខាតផលប្រយោជន៍រួម ហេីយគ្មានអ្នកទទួលខុសត្រូវ ដោយឡែកចំពោះក្រុមហ៊ុន ដែលសាងសង់សំណង់គ្មានគុណភាព ត្រូវតែរាយការណ៍ ដេីម្បីមានចំណាត់ការតាមផ្លូវច្បាប់។
ក្នុងកិច្ចប្រជុំនេះដែរ លោក ខ្លូត ផន ប្រធានក្រុមប្រឹក្សាខេត្តកំពង់ចាម បានលើកជារបៀបវារៈធំៗចំនួនបួន រួមមាន៖ ១.ពិនិត្យ និងអនុម័តលើសេចក្តីព្រាងកំណត់ហេតុនៃកិច្ចប្រជុំសាមញ្ញលើកទី២២ អាណត្តិទី៣ របស់រដ្ឋបាលខេត្តកំពង់ចាម។
២.ពិនិត្យ ពិភាក្សា និងអនុម័តលើសេចក្តីព្រាងរបាយការណ៍បូកសរុបការងារប្រចាំត្រីមាសទី១ និងទិសដៅការងារប្រចាំត្រីមាសទី២ ឆ្នាំ២០២១ របស់រដ្ឋបាលខេត្តកំពង់ចាម។
៣.ពិនិត្យ ពិភាក្សា និងអនុម័តសេចក្តីព្រាងផែនការសកម្មភាពរយៈពេលបីខែ គឺមេសា, ឧសភា និងខែមិថុនា ឆ្នាំ២០២១ របស់រដ្ឋបាលខេត្តកំពង់ចាម។
នៅក្នុងកិច្ចប្រជុំលោកអភិបាលខេត្ត និងលោកប្រធានក្រុមប្រឹក្សាខេត្ត បានណែនាំដល់មន្ត្រីក្នុងខេត្តត្រូវយកចិត្តទុកដាក់ចូលរួមផ្សព្វផ្សាយដល់មហាជន ពាក់ព័ន្ធការងារប្រយុទ្ធប្រឆាំងនឹងជំងឺកូវីដ-១៩៕
