កាណាដា៖ មន្ត្រីនគរបាលកាណាដា បាននិយាយថា ជនសង្ស័យក្នុងអំពើចាក់សម្លាប់មនុស្សផ្តេសផ្តាស់ នៅប្រទេសកាណាដា ដែលបានសម្លាប់មនុស្ស១១នាក់ស្លាប់ និង១៩នាក់ផ្សេងទៀតរងរបួស បានស្លាប់បន្ទាប់ពីត្រូវបាននគរបាលចាប់ខ្លួន។
នគរបាលបាននិយាយថា ឈ្មោះ មីលីស សាន់ឌឺសុន អាយុ៣២ឆ្នាំ ត្រូវបានចាប់ខ្លួននៅលើផ្លូវមួយ ក្នុងខេត្តសាស្កាតជេវ៉ាន់ (Saskatchewan) កាលពីរសៀលថ្ងៃពុធ បន្ទាប់ពីមន្ត្រីនគរបាលដេញប្រផាប់ចាប់ប្រភីងអស់រយៈពេលជាច្រើនថ្ងៃ។
ខ្សែវីដេអូឃ្លីប មហាជនថតបាននៅកន្លែងកើតហេតុ បានបង្ហាញឲ្យឃើញរថយន្តមួយគ្រឿង ពណ៌ស បើកធ្លាក់ចេញពីផ្លូវ ហើយត្រូវនគរបាលឡោមព័ទ្ធជាប់។
ក្នុងចំណោមជនរងគ្រោះស្លាបើ១១នាក់ មានរបួស១៩នាក់ ក្នុងនោះកំពុងសម្រាកព្យាបាលនៅមន្ទីរពេទ្យ៣នាក់ ហើយស្ថិតក្នុងស្ថានភាពធ្ងន់ធ្ងរ។
ជំនួយការស្នងការនគរបាលខេត្តសាស្កាតជេវ៉ាន់ លោកស្រី រ៉ូណា ប្លែកម័រ (Rhonda Blackmore) បាននិយាយក្នុងសន្និសីទសារព័ត៌មាន កាលពីយប់ថ្ងៃពុធថា «ល្ងាចនេះប្រជាជនរស់នៅក្នុងខេត្តរបស់យើងបានធូរទ្រូងវិញហើយ» ។
លោកស្រីបាននិយាយទៀតថា នគរបាលបានទទួលរបាយការណ៍ថា ថ្ងៃមុនជនសង្ស័យឈ្មោះ មីលីស សាន់ឌឺសុន បានលួចរថយន្តអ្នកដទៃដើម្បីជិះរត់គេចខ្លួន។
នគរបាលបានដេញតាមជនល្មើសរូបនេះ បើកគេចខ្លួនក្នុងល្បឿន១៥០គីឡូម៉ែត្រ ក្នុងមួយម៉ោង ប៉ុន្តែនគរបាលបានតាមទាន់ និងកៀបរថយន្តរបស់ជននេះឲ្យធ្លាក់ចូលទៅក្នុងប្រឡាយ ទើបចាប់ខ្លួនបាន និងរកឃើញកាំបិតមួយនៅក្នុងរថយន្ត។
លោកស្រីជំនួយការស្នងការ បានបញ្ជាក់ថា ភ្លាមៗបន្ទាប់ពីការចាប់ខ្លួនបាន ជនល្មើសឈ្មោះ មីលីស សាន់ឌឺសុន បានភ័យស្លន់ស្លោរ ហើយត្រូវបញ្ជូនទៅកាន់មន្ទីរពេទ្យ ដែលក្រោយមកក្រុមគ្រូពេទ្យប្រកាសថា ជននេះបានស្លាប់។
ទោះជាយ៉ាងណាក៏ដោយ លោកស្រីមិនបានផ្តល់ព័ត៌មានលម្អិតបន្ថែមទេ ដោយគ្រាន់តែនិយាយថា មូលហេតុនៃការស្លាប់របស់ជនល្មើស នឹងត្រូវធ្វើកោសល្យវិច័យ ដើម្បីកំណត់មូលហេតុឲ្យបានច្បាស់លាស់។ ប៉ុន្តែមន្ត្រីនគរបបាលសុំនិយាយមិនបញ្ចេញឈ្មោះម្នាក់ បានប្រាប់ប្រព័ន្ធផ្សព្វផ្សាយថា ជនល្មើសស្លាប់ដោយសារមានរបួសលើដងខ្លួន។
ដំណឹងនៃការចាប់ខ្លួនជនល្មើសត្រូវបានប្រកាសភ្លាមៗ ដល់អ្នកប្រើប្រាស់ទូរស័ព្ទដៃនៅក្នុងប្រទេសកាណាដា។ ប៉ុន្តែមុននឹងការចាប់ខ្លួនបាន ទូរទស្សន៍ក្នុងស្រុកបានរាយការណ៍ថា កាលពីថ្ងៃពុជ ជនល្មើសបានលួចចូលទៅក្នុងផ្ទះរបស់ស្ត្រីម្នាក់នៅតាមជនបទ នាម៉ោងប្រហែល២រសៀល ម៉ោងក្នុងប្រទេសកាណាដា ។
ជននេះបានធាក់ទ្វារផ្ទះ រួចស្ទុះចូលទៅក្នុងបន្ទប់គេង ដោយប្រាប់ស្ត្រីម្ចាស់ផ្ទះថា គាត់មិនធ្វើបាបទេ ហើយសុំឲ្យស្ត្រីនោះមកជាមួយ ប៉ុន្តែគាត់ប្រកែក។ ដូច្នេះ ជនសង្ស័យបានយកកូនសោររថយន្តរបស់ស្ត្រីម្ចាស់ផ្ទះ រួមជាមួយទូរស័ព្ទដៃ ទឹក សូដា និងបារី រួចបើករថយន្តនោះចេញបាត់ទៅ ចំណែកស្ត្រីជាម្ចាស់រថយន្តក៏រាយការណ៍បន្ទាន់ប្រាប់នគរបាលអំពីវត្តមានជនល្មើសរូបនេះ។
ក្រោយពីដឹងដំណឹងភ្លាម នគរបាលក៏ចាប់ផ្តើមប្រដេញតាមពីក្រោយរហូតដល់ចាប់ខ្លួនបាន ប៉ុន្តែមិនយូរប៉ុន្មាន ជននេះក៏ស្លាប់នៅពេលបញ្ជូនដល់មន្ទីរពេទ្យ។
មន្រ្តីនគរបាលកាណាដា បាននិយាយ កាលថ្ងៃពុធថា ជនដៃដល់ខាងចាក់សម្លាប់មនុស្សផ្តេសផ្តាសម្នាក់ ក្នុងចំណោមពីរនាក់បងប្អូន ត្រូវគេប្រទះឃើញស្លាប់នៅក្បែរកន្លែងកើតហេតុមួយ។ ជនសង្ស័យឈ្មោះ ដាមៀន សាន់ឌឺសុន (Damien Sanderson) អាយុ៣១ឆ្នាំ បានស្លាប់ដោយសារមានរបួស ប៉ុន្តែមន្ត្រីនគរបាលមិនផ្តល់ព័ត៌មានលម្អិតអំពីប្រភេទរបួសនៅឡើយទេ។ ចំណែកជនសង្ស័យមា្នក់ទៀត ត្រូវជាប្អូនប្រុសបង្កើត ឈ្មោះ មីឡេស សាន់ឌឺសុន (Myles Sanderson) អាយុ៣០ឆ្នាំ កំពុងតែរត់គេចខ្លួន។
នៅក្បែរសពរបស់ឧក្រិដ្ឋជនឈ្មោះ ដាមៀន សាន់ឌឺសុន គេប្រទះឃើញរថយន្តមួយគ្រឿង ដែលនគរបាលប្រកាសថា ជារថយន្តរបស់ជនល្មើសជិះធ្វើសកម្មភាពចាក់សម្លាប់មនុស្សពីខេត្តមួយទៅខេត្តមួយ ក្នុងរយពេលតែមួយថ្ងៃ នៅក្នុងចម្ងាយដីរាប់រយគីឡូម៉ែត្រ៕
