ហូជីមិញ៖ ចំនួនមនុស្សស្លាប់ក្នុងអគ្គិភ័យឆាបឆេះហាងខារ៉ាអូខេ នៅក្បែរទីក្រុងហូជីមិញ កាលពីថ្ងៃអង្គារ បានកើនឡើងដល់យ៉ាងហោចណាស់៣២នាក់ និងផ្សេងទៀតបានរងរបួស។
អគ្គិភ័យបានចាប់ផ្តើមឆាបឆេះនៅជាន់ខាងលើនៃហាងខារ៉ាអូខេ ឈ្មោះ អានភូ (An Phu) នៅក្នុងខត្តប៊ីញដួង ខាងជើងទីក្រុងហូជីមិញ បានសម្លាប់ភ្ញៀវ និងបុគ្គលិក អស់ជាច្រើននាក់ ដែលកំពុងជាប់នៅក្នុងបន្ទប់ច្រៀងរាំ។
កាសែតរបស់នគរបាលវៀតណាម បាននិយាយថា មនុស្ស៣២នាក់ស្លាប់ ក្នុងនោះមានបុរស១៧នាក់ និងស្ត្រី១៥នាក់។
យោងតាមក្រសួងសន្តិសុខសាធារណៈរបស់វៀតណាម បានឲ្យដឹងថា មានមនុស្សប្រហែល៦០នាក់ បានស្លាប់ក្នុងករណីអគ្គិភ័យឆេះក្លឹបកមន្សាន្ត នៅក្នុងប្រទេសវៀតណាម នារយៈពេលប៉ុន្មានឆ្នាំកន្លងមកនេះ។
ក្រសួងបានលើកឡើងថា នេះជាការសម្លាប់យ៉ាងសាហាវបំផុត ក្នុងការឆេះហាងខារ៉ាអូខេ នៅប្រទេសវៀតណាម ក្នុងរយៈពេលប៉ុន្មានឆ្នាំចុងក្រោយនេះ ដែលបង្កើនការព្រួយបារម្ភអំពីស្តង់ដារសុវត្ថិភាពមិនល្អ នៅក្នុងកន្លែងកម្សាន្តរបស់វៀតណាម។
កាលពីម្សិលមិញ នគរបាលវៀតណាម បានរាយការណ៍ថា យ៉ាងហោចណាស់មនុស្ស១២នាក់បានស្លាប់ និងជាច្រើននាក់ទៀតបានរងរបួស បន្ទាប់ពីអគ្គិភ័យដ៏ធំមួយឆាបឆេះហាងខារ៉ាអូខេនេះ ហើយបានឆាបឆេះយ៉ាងលឿនចូលដល់បន្ទប់មនុស្សកំពុងច្រៀងរាំសប្បាយ។
អគ្គិភ័យដ៏ធំនេះ បានចាប់ផ្តើមឆាបឆេះយ៉ាងលឿននៅជាន់ខាងលើនៃក្លឹបកម្សាន្ត ដោយធ្វើឲ្យឆេះស្លាប់អ្នកច្រៀងរាំកន្សាន្ត ចំណែកអ្នកខ្លះទៀត បានលោតចុះពីជាន់ទី២ និងទី២ធ្វើឲ្យមានរបួស ប៉ុន្តែមិនស្លាប់ឡើយ។
រថយន្តពន្លត់អគ្គីភ័យវៀតណាម បានទៅដល់កន្លែងកើតហេតុភ្លាមៗ ប៉ុន្តែអគ្គីភ័យបានឆេះអស់រយៈពេលមួយម៉ោង ទើបរល់តទៅវិញដោយសាររថយន្តបាញ់ទឹកពន្ល់ត ហើយគេមិនទាន់ដឹងពីមូលហេតុច្បាស់លាស់នៅឡើយ។
ហាងខារ៉ាអូខេ ឈ្មោះ អានភូ (An Phu) ដែលមានទីតាំងនៅក្នុងខេត្ត ប៊ិញដួង មានទំហំធំគ្រាន់បើ ចំនួនមាន២៩ បន្ទប់។ មន្ត្រីនគរខេត្ត បាននិយាយថា អគ្គិភ័យបានបំផ្លាញអគារស្ទើរទាំងស្រុង។
កាលពីដើមខែវិច្ឆិកា ឆ្នាំ២០១៦ អគ្គីភ័យបានឆេះហាងខារ៉ាអូខេមួយកន្លែង កម្ពស់៨ជាន់ ស្ដិតនៅក្នុងក្រុងហាណូយ ប្រទេសវៀតណាម ដោយបានសម្លាប់ជីវិតមនុស្សអស់១៣នាក់៕
