អន្តរជាតិ៖ អ្នកកាសែតជើងចាស់របស់ស្ថាប័នទូរទស្សន៍ដ៏ល្បីនៅលើពិភពលោក Al Jazeera គឺលោកស្រី ហ្សីរីន អាប៊ូ អាក់ឡេះ (Shireen Abu Akleh) ត្រូវទាហានអ៊ីស្រាអែល បាញ់សម្លាប់នៅតំបន់ West Bank ដែលស្ថិតក្រោមការត្រួតត្រារបស់រដ្ឋាភិបាល អ៊ីស្រាអែល។
លោកស្រី ហ្សីរីន អាប៊ូ អាក់ឡេះ អាយុ៥១ឆ្នាំ ត្រូវទាហានអ៊ីស្រាអែល ពួនបាញ់ពីចម្ងាយពេលនាងកំពុងយកព័ត៌មាន នៅជំរុំជនភៀសខ្លួន។ ទោះបីជាពាក់អាវកាក់កាសែតក៏ដោយ គ្រាប់មួយគ្រាប់ បានទម្លាយផ្ទះផ្ទៃមុខរបស់នាង ចំណែកអ្នកកាសែតម្នាក់ទៀត ជនជាតិប៉ាឡេស្ទីន ឈ្មោះ អាលី អាល់សាមូឌី (Ali al-Samoudi) បានរងរបួសខ្នង។
ទូរទស្សន៍ Al Jazeera បានចេញសេចក្តីថ្លែងការណ៍មួយ និយាយថា លោកស្រី ហ្សីរីន អាប៊ូ អាក់ឡេះ ត្រូវគេធ្វើឃាតដោយឈាមត្រជាក់ ហើយបានអំពាវនាវឲ្យសហគមន៍អន្តរជាតិថ្កោលទោសចំពោះទង្វើរបស់កងទ័ពអ៊ីស្រាអែល។
គណៈប្រតិភូសហភាពអឺរ៉ុបប្រចាំប៉ាឡេស្ទីន បានសម្តែងការភ្ញាក់ផ្អើលចំពោះការសម្លាប់លោកស្រី ហ្សីរីន អាប៊ូ អាក់ឡេះ ដោយអំពាវនាវឲ្យមានការស៊ើបអង្កេតរហ័ស និងឯករាជ្យ ដើម្បីនាំជនល្មើសមកកាត់ទោ ដើម្បីធានាសុវត្ថិភាព និងការពារអ្នកកាសែត ពេលយកព័ត៌មានក្នុងតំបន់មានជម្លោះប្រដាប់អាវុធ។
សាក្សីឃើញផ្ទាល់ភ្នែក និងអ្នកកាសែតជាមិត្តរួមការងារ ឈ្មោះ សាន់ថា ហាណៃហ្សា (Shatha Hanaysha) និយាយរំឭកថា អ្នកកាសែតនៅកន្លែងកើតហេតុ នាំគ្នាភ័យស្លន់ស្លោរ និងខ្នះខ្នែង ពេលឃើញនាងត្រូវគ្រាប់កាំភ្លើង។
លោកស្រី សាន់ថា ហាណៃហ្សា បាននិយាយថា «ពួកយើងឈររួមគ្នា ក្នុងនាមជាអ្នកសារព័ត៌មាន បន្ទាប់មកយើងចាប់ផ្តើមដើរ យើងភ្ញាក់ផ្អើលចំពោះគ្រាប់កាំភ្លើងពិតបាញ់សំដៅពួកយើង។ ពេលនោះ យើងទៅណាក៏មិនរួចដែរ ទៅមុខក៏បាន ថយក្រោយក៏មិនបាន។ យើងនៅពីមុខខ្មាន់កាំភ្លើង។ ប្រសិនបើខ្មាន់កាំភ្លើងពិតជាចង់បាញ់សម្លាប់ពួកយើងណាម្នាក់ ខ្មាន់កាំភ្លើងទាំងនេះ អាចបាញ់មុនពេលយើងមកដល់។ ខ្ញុំឃើញយ៉ាងច្បាស់ថា នេះទង្វើធ្វើឃាតអ្នកកាសែតយ៉ាងពិតប្រាកដ»។
លោកស្រី សាន់ថា ហាណៃហ្សា បាននិយាយទៀតថា «អ្នកបាញ់សម្លាប់ គឺមានបំណងសម្លាប់តែម្នាក់ហ្នឹងទេ ព្រោះគេបាញ់តម្រង់ក្បាលតែម្តង»៕
